TANG NAPA’PEMALINNA PUANG MATUA

Iatu nenne’ mendadi sukaranta umpokada pemali iamo ke tang situru’mi kabiasan tu apa dadi sia ditangnga’. La taissan kumua iatu mella’ka’ lako bang kabiasan bisa bangsia pusa. Pembuda dadi tu umpatongan kabiasan, apa tang umpopa’biasa katonganan.

               Sura’ Penggauranna Rasulu’ 10:9-23a unnuleleanan diona apa tang biasa na tiro sia na tangnga’ Petrus. Pussak penaanna Petrus belanna senga’ pentirona diona parenta-Na Puang tu ussuai untunu sia ungkande mintu’ olo’-olo’. Nasanga pemali Petrus, apa “tang Napemalinna Puang Matua.” Ia tu patirona Petrus den battuananna. Sitonganna la nanai Puang umpamalesoi lako Petrus, unlendu’i Kornelius, kumua iatu Puang Nakaelo tu kasalamaran lako mintu’ bangsa. Tae’ Napasengaran Puang, la to Yahudi, la to tang Yahudi.Melo dipemaranga tu battuananna pebalinna Petrus kumua apa pemali tu dipatiroanni. Iatu tangnga’ iate, situru’ kabiasan pa’tangngaranna to Yahudi kumua tae’ tu to senga’ la dikarimmanni, to Yahudi manna ia (kilalai ulelean kasipa’kadanna Puang Yesu na misa’ baine to Samaria lan Yohanes 4:5-42). Na patudu Puang tu Petrus dikua da’ anna umpatongan bangri kabiasan, sangadinna la umpopa’biasa katonganan kumua parallu naissan mintu’ tau tu kasalamaran. Tiangka’ penaanna Petrus male umpessitammui Kornelius misa’ to Italia la umpamanassa kasalamaran lan Kristus.

               Mendadi pa’nannungan lako kita kumua tae’ siaraka ta tontong duka bangpa “umpemalianni” tu umpokada kasalamaran lako mintu’ tau? Susinna ke tasangai kumua iate mai to tang lao bang ma’gereja inang “kabiasannamo iato.” Ta sa’biangan bangmi, tang dipakilala, iaraka na mbai den bangmo tu tau ma’tangnga’ kumua pemali la male sibaa tau susi to mai. La susiki’ Petrus, kamatotoranNa Puang unnnanta’i umpokada kareba kasalamaran lako bangsa senga’ tu nasanga to Yahudi tang salama’. Kamatotoran iadukamo to tu la umpatiangka’ penaanta umpopa’biasa katonganan kumua iatu kareba kasalamaran dio kaleta sipatu dipa’peissanan lako mintu’ tau. Ma’ondonganna lako to lan banuanta, rapunta, kombonganta, sang tondokta, ke denni tu umpamakarra’ bangpa penaanna tang menturu’ lako Puang. Amin.