RENUNGAN HARIAN TORAYA (REHAT)
Senin, 29 Juli 2024
SILASANNA LAKO KALE
(Mencukupkan diri)
Filipi 4:10-20
Den misa’ kada tu napa’popetandan to Yunani, Plato, iamo tu sophrosune (keugaharian). Yanna lan basa Toraya disanga ma’anggean (mawas diri), ba’tu bisa bangsia dikua umpokadai silasa. Kada iate takua duka ma’din dikaduttu’ lan ba’tengta belanna budamo tu apa diposara’ nenne’ bangmo ullendu’i tu sipatunna lako kaleta. Tang balle kumua mintu’na tuladi pogau’ inang dipogau’ ponno penaa, apa den tu pira-pira kabiasan nenne tang diingaran iamotu disanga silasanna. Ombo’ dukami lako Rasulu’ Paulus lan te pa’basanta kumua na peladai’mo tu disanga umpasilasai tu apa diona kalena (ay. 11). Na lako kita, dipeladai’ dukamo raka tu disanga diposilasanna?
Lan te pa’basanta attu totemo na pakanassan Paulus lako kombongan dio Filipi kumua na issanni tu mangringki-ringki sia malabo, apa tontong na lanakanassai kumua diona tumintu’na inang ma’din na pogau’ belanna Kristus tu umpamatoto’i (ay 12-13). Iamoto, tae’mo kamatakuranna tinde rasulu’ Paulus ullingkananni tu katuoanna, moi raka na lan pa’tarungkuan tonna attu. Napatarru’ dukai kumua tae’ ia na undaka’ pamengan sangadinna iatu nadaka’ dikua na sakeranganna tu bua kamaseroan, belanna iatemai barang apa rampo lako katuoanta ma’din la torro melo iake dipadoloi tu diona kasiumpuran sola Kristus. Ia dukamo la unggannai’ temai mintu’ diparalluinna ullendu’i Penaa Masallo’.
La tontong dikilalai tu diona panganta’Na Puang lan passanan tengkota. Ma’din duka dipengkullei tu diona silasanna lako kaleta, tangia diona manna kande, apa mintu’ diposara’na keallo-kebongi. La tontong dianga’ tu peta’tanNa Penaa Masallo’ dikua anna panundu’ki’ umposilasanni temai kaparalluanta sia dikua anna den toyang diomai kabarakan. La manappa’ki’ kumua Puang la umpasilasai tu mintu’na lako kaleta. Amin.
