RENUNGAN HARIAN TORAYA (REHAT)
Senin, 26 Agustus 2024
PARANDANGANNA KAPATONGANAN
( Fondasi Iman )
Pa’pudian 11:1-7
Den tau diomai Jerman disanga Martin Heidegger (filsuf) umpokadai kumua den tu disanga katirambanan (ketakutan–furcht) sola rosso (kecemasan–angst). Ia kumua iate katirambanan iamo madomi‘ untumang tau anna pogau’i umpogau’i tu kakelokan. Apa iate rosso umpabutu’ kamengkilalan lako katuoanna. Iamo to na sitonganna diparallui duka tu na sanga Heidegger rosso. Umba sitonganna tu rosso disanga ladipomelona lan a’ganna kapatonganan ta?
Dilesang lan te pa’basanta kumua iate Daud umbaenanni tu diona kamapa’diran sia rosso inaa tonna ula’i Saul. Sae tongan tu kamatakuran urrandanni tinde Daud to attu. Iamoto na marannu tu Daud lako Puang kumua Iamo inan pentirerunganna. Lendu’ mataku’na tu Daud tonna ulai’ Saul, Apa lan kamatakuran sia karossoan anna pokadai lako Puang kumua Ia manna inan pentirerunganna, umbasusi tu a’gan urrampoi.
Ta pemarangami tu aya’ (3) nakua “iake mintu’i parandangan disaeran, apapa tu lana pogau tomalambu’?”. Na pessa’bian kumua manassa iamo kamatotoran tu tontong umpoparandangan kapatonganan lako Puang Matua. Kamatakuran sia karossoan penaanna to ma’pudi umpopengkilalai kumua den tu Puang la mendadi sissarean matoto’ sia pentilindungan.
Jani Ortlund misa’ pandita diomai Amerika Serikat umpokadai kumua “…Pebalinna tu kamatakuranta iamotu kamengkaolan tongan lako Puang tu ungkamaseiki’, sia mangka umpa’bengan kalena” Lako kita angga toma’patongan. Ta tontongmo manappa’ lako Puang belanna iamo oto’na katilendokan sia kamakarimmanan tu kuasa ullendokanki’ diomai mintu’ bala’ sia kasanggangan.Amin.
