METAMBANA’ LAKO KALEMI

Den misa’ to mangura disanga Yomel, marassan umpaningoi HP. Rampomo ambe’na mesua male unnangka’ resa’ la digiling. Malemi Yomel unnangka’ tu resa’, nabawai lako diniinna ma’giling. Ia tonna lanmo lalan, pakalan natodomi batu tu lentekna Yomel. Tobangmi tu Yomel na i’pinni pissanpi resa’ tu lentekna na tiretok. Ta’pa metambami tu belanna mapa’di’mo nasa’ding. Napemandui metamba lako ambe’na kumua mapa’di’ nasa’ding. Naanga’ lan penaanna kumua la nadaranai ambe’na.

               Susi duka tu nalambi’ Daud lan te pa’basan. Naperasai tongan tu kamamasean-Na Puang mempayan lan katuoanna. Iamoto na tontong rampo massambayang lako Puang. Tang toremi rampo metamba dio olo-Na Puang. Ondongpi marassan lan kamasussan sia kara-kara katuoan. Lan a’gan sisonda situka’ , tontong natiro Daud kumua Puang kalena la umpatiroan tanda mamase-Na (ang. 7).  Moiraka masussa tu a’gan natingayo, tontong napalaku kumua Puang la ungkarimmanni butung to mata tau sia Puang la urrerungi diong to’ pani’-Na Puang (ang. 8). Moi rampo ualinna la morai untaloi taunNa Puang, apa rampo Puang urrampananni dio mai tau iato mai (ang. 14). Puang bendan mendadi To patunduan lan katuoanna Daud. Tae’ senga’na tu la nassattuan ullendokanni dio mai kamasussan. iamoto na tontong batta metamba lako Puang ullendui passambayang.

               Susi dukamo lan katuoata keallo-keallo, buda duka tu kamasussan katuoan tatingayo. Sisonda situka’ tongan te a’gan taolai. Apa la tontongki metamba lako Puang ullendui passambayangan. Belanna iatu mintu’ kamatotoran sia pa’tunduan rampo lu dio mai Puang Matua. Mai komi ta rampo metamba massambayang lako Puang. Lu lako manna Puang tanii metamba umbaa sarrota. Amin.